Compostela, cidade turística pouco accesible no seu

Día a día, milleiros de persoas utilizamos o transporte público en Compostela para nos movermos pola cidade e, seguramente, moitos suframos algunha diversidade funcional que nos afecte a mobilidade, como é o meu caso.

Probablemente, quen lea estas liñas non comprenderá o motivo polo cal expoño o meu descontento co servizo de autobuses urbanos de Compostela. A miúdo, uso o transporte público da capital galega, dado que me facilita o desprazamento pola cidade, mais atópome cun lastre: a falta de indicacións por audio de cada unha das paradas que a respectiva liña de autobús vai realizar. En caso de existiren eses avisos sonoros, axudaríannos a min e a outras persoas co mesmo problema a baixar na parada que desexamos, sen ter que lle pedir ao condutor ou condutora que nos indique cal é a parada.

No caso que se requira este servizo de axuda, corremos o risco de que quen ten que atender a guiar non se lembre de facernos o recordatorio. Iso xa me ten acontecido algunha que outra vez e vinme obrigado a orientarme desde unha parada que non era a miña.

Existe ineficacia tanto do Concello de Santiago como da empresa concesionaria dos autobuses. Logo de varias peticións para incluír a megafonía, fíxose caso omiso. O único que se lles comunicaba aos usuarios que o solicitaban é que se ía renovar a flota, xa co sistema incluído. Unha parte foi renovada, mais sen megafonía ou, se a ten, desactivada. O servizo de orientación sonora non só axudaría as persoas con problemas visuais, tamén serviría de axuda aos milleiros de turistas que visitan Santiago.

Outra cuestión non menos importante é a falta de inclusión das liñas de buses coas súas respectivas paradas na coñecida app Google Maps. Compostela é unha das poucas cidades que non o teñen dispoñible na plataforma e, sendo unha cidade tan receptora de turistas, non entendo a deixadez de que este problema non estea arranxado. É certo que o Concello habilitou unha aplicación para ter toda esa información, mais o deficiente funcionamento a mais de un lle ocasionou algún que outro desgusto.

Quero aproveitar este espazo para pedir ao Concello de Santiago de Compostela e á empresa concesionaria dos autobuses urbanos da cidade que atendan as peticións e propicien así unha cidade inclusiva. O transporte accesible será beneficioso para toda a cidadanía.

.

Compostela, marzo de 2020.