"Desacomplexadamente independentistas"

Redacción adiante | A Coruña | 5 de outubro.  “Chamamos ao conxunto do soberanismo a participar na nova organización estratéxica centrada na construción de poder popular, a activación social e o traballo de base como alicerces sobre os que articular un proxecto revolucionario de futuro para a Galiza da nova década”, anima o documento que nace do proceso “de debates realizados nos últimos meses e anos” polo Movemento Galego ao Socialismo, unha organización que fai parte do BNG, e que aposta por “intervir e contribuír desde posicións de clase no reforzo das organizacións frentistas e de masas : o BNG, a CIG e todos os movementos sociais transformadores”.

“Cómpre criar ferramentas de intervención adaptadas á nova fase política, que teñan en conta as mudanzas dos últimos anos e permitan que o avance e a relexitimación do soberanismo vaian alén do eleitoral, permitíndonos sumar máis forzas coas que confrontar o Réxime Español do 78”, reflexiona o texto, cuxos autores urxen “reactivar e dinamizar o debate político e a formación no seo do movemento soberanista” nun momento de crise no que “é imprescindíbel motivar, tensionar e mobilizar forzas e vontades”.

“Queremos facelo impulsando novos modelos organizativos que teñan en conta a realidade social e a crecente precariedade das nosas vidas”, prometen.

[nos próximos días, o adiante.gal abrirá un espazo para apuntamentos neste debate sobre a independencia ás diferentes ‘sensibilidades soberanistas’ da Galiza nunha serie baixo o rótulo de A(s) independencias(s) hoxe. Na conta de correo adiante@adiante.gal recolleremos achegas susceptíbeis de facer parte del.]