Vítimas do Alvia demandarán o Ministerio de Transportes se non hai investigación independente

Esixen que o Estado presente un informe sobre o accidente como recomenda a Unión Europea e para chegar ao xuízo coas máximas garantías.

Compartilhar no facebook
Facebook
Compartilhar no twitter
Twitter
Compartilhar no google
Google+
Compartilhar no whatsapp
WhatsApp
Compartilhar no telegram
Telegram
Compartilhar no email
Email
Compartilhar no facebook
Compartilhar no twitter
Compartilhar no google
Compartilhar no whatsapp
Compartilhar no telegram
Compartilhar no email

Redacción adiante | A Coruña | 19 de decembro 2020.  Onte foi outro día triste para as familias afectadas polo accidente ferroviario de Angrois (Compostela) o 24 de xullo de 2013. Sete anos e medio despois da traxedia que rematou coa vida de 80 persoas e deixou 152 feridos, as familias volveron petar nas portas do Estado, que seguen fechadas en defensa dos dous máximos responsábeis políticos: os ex ministros José Blanco (PSOE) e Ana Pastor (PP).

O Estado defende Blanco e Pastor e unha lista de altos cargos públicos. O Estado é o actual ministro, José Luis Ábalos (PSOE), que fai como que non oe, e o partido socio de goberno, Unidas Podemos, que fai como que non ve.

As familias anunciaron onte en Madrid, ás portas do ministerio, que presentarán unha acción xudicial contra o Ministerio de Transportes e a CIAF (Comisión de Investigación de Accidentes Ferroviarios), o organismo público responsábel da investigación do sinistro. Como paso previo, a asociación de vítimas rexistrou un documento no que pide o Ministerio “a renovación de parte dos membros da Comisión, que a día de hoxe non goza de independencia” e que a CIAF “leva a cabo unha nova investigación obxectiva tutelada pola Axencia Ferroviaria Europea e que cumpra cos requisitos legalmente establecidos, en especial, a independencia dos seus membros, o trámite de audiencia ás vítimas e atenda a totalidade de deficiencias expostas no documento da Axencia Ferroviaria Europea”.

Familiares de vítimas do Alvia, este venres diante do Ministerio de Transportes en Madrid. @víctimastren

Se no prazo de tres meses, as vítimas non reciben unha resposta ou non se atenden as súas peticións, comezarán o proceso xudicial vía contencioso-administrativo da man do letrado Antonio Benítez Ostos.

Onte, nunha concentración diante do ministerio, as familias volveron lembrar que no 2016 un informe da Axencia Ferroviaria Europea determinou que o Goberno español non cumpriu coa obriga de investigar a traxedia e puxo de manifesto a falta de independencia e a invalidez da investigación realizada pola CIAF, “xa que non analizou as causas de raíz”, din os afectados, “precisamente aquelas que afectan ao propio Ministerio de Transportes, a Adif e a Renfe. Aquel documento xa solicitaba unha nova investigación e, en xaneiro de 2019, hai agora case dous anos, a Comisión Europea iniciou un procedemento sancionador contra o Estado español polo incumprimento das directivas comunitarias en materia de investigación de accidentes.

Malia presión desde Europa e a denuncia desde diferentes instancias políticas -na Galiza, o BNG parece ser o último apoio das familias desde que Unidas Podemos entrou no goberno-, o Ministerio de Transportes que dirixe José Luis Ábalos non deu un só paso.

“O Ministerio vulnerou as normas nacionais e comunitarias ao nomear membros da CIAF non independentes nin imparciais, e polo tanto non garantiu unha investigación conforme á normativa”, insisten as familias. “A día de hoxe, a CIAF segue sen ser independente dado que parte dos seus membros prestaron previamente servizos no Ministerio, en Adif, en Renfe ou no Ineco [organismo público de enxeñería e consultora de transporte]”.

Na causa, pendente o xuíz de sinalar a data do inicio do xuízo, están imputados o maquinista e un responsábel de Adif no momento do accidente, Andrés Cortabitarte. Ninguén máis. Ningún dos responsábeis políticos da posta en marcha e da xestión dunha infraestrutura que se ten acreditado presentaba erros de seguridade que a propia Administración coñecía e decidiu ignorar.

“Di moi pouco das nosas institucións e dos nosos gobernantes que aínda non se teña posto en marcha a investigación independente que solicita a UE. E di moito menos que o ministros Ábalos leve máis de dous anos despreciándonos. É indignante que nin nos conteste”, láianse as vítimas, outra vez, outro día triste máis.