Proxecto en revisión

Información de interese para lectoras, colaboradoras e subscritoras.

Remata unha etapa do adiante.gal; a cooperativa para, o xornal segue.

Share on facebook
Facebook
Share on twitter
Twitter
Share on google
Google+
Share on whatsapp
WhatsApp
Share on telegram
Telegram
Share on email
Email
Share on facebook
Share on twitter
Share on google
Share on whatsapp
Share on telegram
Share on email

As editoras | Ourense, 9 de xaneiro de 2019.  Hoxe remata a primeira etapa do adiante.gal. No último día do ano demos de baixa a cooperativa. Aínda estamos moi lonxe do que soñamos ser quen de ofrecer. Calibramos mal as propias forzas. Faltounos tempo e percorrido para cumprir cos servizos prometidos ás nosas subscritoras. Apenas cumprimos coas lectoras. A lingua dos textos foi perdendo calidade en canto quedamos orfos da correctora lingüística e a profundidade e coidado dos textos tampouco mellorou na medida en que non conseguimos estabilizar un equipo de colaboradoras.

Tampouco consolidamos a estrutura comercial inicial e, despois do impulso que ao principio nos dera a persoa responsábel desa área, ter que prescindir dela acabou lastrando o proxecto. Ficamos cortas na pata social, por incapacidade para atender calquera fronte máis alá do traballo de redacción e edición. E seguramente defraudamos as expectativas de moitas lectoras que esperaron esa cooperación aberta prometida no inicio.

O demais, as cousas boas que nos animan a seguir co proxecto, non dan para soster unha mínima estrutura empresarial, cooperativa ou non. Nese plano o asunto detense aquí. Fica en revisión. Non dispoñemos de capacidade financeira para perseverar na idea actual a pesar de que seguimos acreditando na súa necesidade. Nós podemos traballar gratis, mas cremos que as nosas colaboradoras merecen que o seu traballo sexa retribuído. E os traballos remunerados que en paralelo intentamos manter, impídennos meterlle todas as horas precisas. Así que paramos aquí a cooperativa. O xornal segue.

Estas semanas anteriores estivemos pensando como continuar cunha parte do proxecto. Seguiremos dándolle voltas nas semanas que veñen, e iremos publicando e continuando cos temas que traballamos na medida que poidamos, tratando de mellorar no trato da lingua e na relación coas lectoras.

Polo camiño atopamos cómplices e bastante simpatía dalgunha xente que nos animou, axudou e apoiou (máis aló dos imprescindíbeis colegas que nos confiaron uns euros). Mesmo intuímos que estivemos próximas a xuntar ese equipo mínimo de redacción e deseño, e coas vinte fieis articulistas que nos acompañaron. Case sucedeu, pero manternos fieis á idea inicial (prescindir de publicidade institucional e pagar polas colaboracións e opinións) non chega se non somos capaces de conseguir un número de subscritoras suficiente para que o esforzo e o tempo abran máis luz no camiño e a dedicación persoal que supón pague a pena. Non renunciamos a estar e contar desde outro lado, a que a información non teña como axenda central a actualidade institucional e dos partidos senón a social. E nesa seguiremos, pero de outra maneira, achegando as nosas pequenas forzas a todas as pequenas forzas que camiñan na nosa mesma dirección.

Afortunadamente, o que si conseguimos é espertar interese nesa idea de cooperación con outros medios ‘formiga’ e ‘caracois’ coma nós. Nos últimos días empezamos a procurar esa colaboración imprescindíbel para tecer rede.

O adiante.gal segue, necesariamente un pouco máis pequeniño e aínda máis lento. Volvemos á imaxe do caracol coa que celebramos o primeiro mes, teimaremos en chegar á das formigas coa que festexamos o terceiro, e soñando nesa rede da araña que ilustrou o sexto mes. Afortunadamente, o que si conseguimos é espertar interese nesa idea de cooperación con outros medios ‘formiga’ e ‘caracois’ do país e fóra do país. Nos últimos días empezamos a procurar esa colaboración imprescindíbel para tecer rede. Seguimos acreditando nese camiño.

Grazas a todas pola paciencia, o alento e cariño. E xuntas teimaremos no adiante.gal

Imaxe: @Amparo Portabales.

Deixe um comentário

Deixe um comentário